جمال زكي عينر /دار الكتاب للادب العربي والثقافة

 ( جيتي ف ثانية وروحتي ف ثانية ) :

جيتي ف ثانية وروحتي ف ثانية

زى الدنيا القاسية الفانية

طب ليه جيتي وطب ليه روحتي ؟ 

إتسببتي ف حيرتي ودوختي

كنت مفكر لما ألاقيكي

هلقى معاكي هنايا وراحتي

وإن الفرحة هتكمل بيكي

لكن حظي و قِلِة بختي

ياريتك كنتي ما روحتي وجيتي

ولا عديتي ف يوم على بيتي

كنت إرتحت وعشت ف حالي

ولا كنتيش على عشى جنيتي

إيه اللي كسبته لما جيتيني ؟ 

غير طيرتي النوم من عيني

روحي يا شيخه وقلبي مسامحك

روحتي وفايته كل ملامحك

بسهر ليلي افكر فيكي

ورد خدودك سحر عينيكي

واما بلاقي النوم يجافيني

والقى الدمع يسيل من عيني

أفضل أغني اغاني حزينه

ولا عنك حاجه بتغنيني

إوعى تفكري تاني تعدِّي

ومراكبك على شطي تهدِّي

وِحياتِك تسيبيني ف حالي

أنا عايش دنيتي على قدِّي

وحياتك تسيبيني ف حالي

أنا عايش دنيتي على قدِّي

        بِقَلَمِي الشَّاعِر جَمَال زَكِي عِينَر